هـــو و هـــى

بيشغل تفكيرى اوى شوية تفاصيل كدة ممكن فى صحابى و محيط الحياة اللى حواليا

بس بما انى بنت و بيقولو Ladies First و كده لازم بقى ابدا بتفاصيل بنى جنسى

 
مع تركيزى مع البنات لاحظت كذا حاجة هقولهم واحدة واحدة كدة

اللى لما بسالها مصاحبة فتقولى لا .. مع ان هى مصاحبة اربعة مثلا فى نفس ذات اللحظة
 ساعتها بفكر انها مش بتقول لسببين
الاولانى : ان انا ممكن احقد عليها مثلا او ابصلها فى صاحبها
و التانى : انها شايفة انها حاجة عيب ولا حاجة فمش بتقول

طيب سيبنا من الفرض الاول علشان دى نفسيات و كل واحد و نفسيته بقى و كدة و خلينا فى الفرض التانى
لو هى شايفة انه عبب او انها مكسوفة ليه بتعمل كدة ؟ 

و ايه السبب اللى مخليها شايفة انه عيب و لما هو عيب او غلط ليه مستمرة فيه ؟؟؟

نصيحة منى لو شايفة ان بنت بتغل منك علشان انتى مصاحبة فاكيد ده لانك انتى نفسيتك سودة و كنتى بتغلى منهم و انتى سينجل

و لو شايفة انها حاجة تستدعى التخبية يبقى انتى غلط من الاول و قولى لنفسك ستوب و متكمليش فى اللى انتى فيه

بلاش ده .. فى بنات كدة واخدة مقلب فى نفسها و حاسة انها ياما هنا ياما هناك او بتتصنع الرقة و الانوثة مع ان هى فى بيتهم هى و اخوها ميفرقوش عن بعض كتير

مش هقول ان الثقة وحشة .. و مش هقول ان احساس البنت بنفسها وحش لانه اكتر حاجة سليمة

خليكى واثقة فى نفسك بس قبل ما تتنكى على خلق الله بصى فى مراية بيتكوا .. بلاش..  مرايات بيتكوا كلها متكسرة ؟؟. بصى فى اى طاسة هتشوفى برضه .

الغرض انى اقول ان الثقة حلوة بس التصنع اسوا حاجة و بيبان على فكرة و بيبقى شكلك وحش اوى فبلاش منه

اخر حاجة بقى البنات اللى بتنفسن من بعض دى قولتها قبل كدة و هقولها الف مرة ان مفيش بنت وحشة و كل بنت فى اللى بيميزها ,, اى بنت ممكن تبقى ملكة جمال بخطوتين اتنين

1- صفى النفسية و بلاش الحقد

2- متقارنيش نفسك بحد

نيجى بقى للجنس الاخر .

دلوقتى بقى الشباب مفهومهم عن الجمودية مغلوط 180 درجة

بقت الموضة الشباب الجامد اللى بيشتم و بيعمل حاجات مش ولابد لا و مش بس كدة ده بيتفشخر انه بيعمل كدة  كمان

احب اقولك يا موكوس على عينك ان انت كدة مش جامد انت كدة تافه مش الرجولة بانك تعمل كل ده . راجع نفسك و افهم معنى الرجولة كويس

و فى ناس تانية بقى شايفة ان الجمودية انها تفضل تتريق على خلق الله و تبقى عاملة زى البهلوان بتتنطط و تضحك علشان خاطر يبقى ابو دم خفيف اللى كل البنات بتحبه و كدة

احب اقولك برضه انك كدة مش جامد و قبل ما تتريق على الناس بص لنفسك كويس اوى علشان انت فيك العبر بس انت صاحبنا و كدة ف مكسوفين نتكلم :)

اما بقى الاكثر انتشارا الايام دى الشباب ال ( المنسون) اللى بيرغى كتير و بيحب الحوارات .. مالك يا حبيبى ايه اللى مضايقك ؟؟ ما هو مش يا اما عاملنا فيها شجيع السيما يا اما عامل فيها سوسن بنت خالتى

فى و سط ارحمونا الله يهيدكوا و اعقلوا كدة و سيبوا الكلام ده للبنات علشان كدة عيب و على فكرة صحابك البنات اللى بترغى معاهم بيزهقوا منك و بيقولوا عليك انك اختهم و كدة

(( ميرضيكش الكلام ده صح ؟؟ طيب يبقى نعقل بقى و نركز ))

خلاصة الكلام  مفهوم الرجولة و الانوثة عندنا بقى مغلوط و ملوش ملامح واضحة و كله راجع للتربية الغريبة لحد ما بقت كارثة جيل بحاله مش واحد و لا اتنين و لا الف .

احنا بنروح فى داهية اهو خدوا بالكم .

الشخصية الى اين ؟

كل حاجة فى الفترة دى بقت ماشية على شاكلة هما بيقولوا او اصلها طالعة موضة .
 مين اللى بيقول و مين اللى بيطلع مش عارفين طب ليه مبقاش انا اللى بقول و انا اللى بطلع ؟؟

ليه امشى ورا الناس و كلامهم مع ان ممكن ده يبقى ضد مبادئى و تفكيرى كليا . بس اصل هو مفروض كدة فاعمل كدة !! 

بشوف ده بارز جدا فى البنات فى موضوع اللبس و الاشاربات و الشعر , تسال واحدة انت عاملة فى نفسك كدة ليه تقولك و راسها مرفوعة فى السما : ايه الجهل ده . دى موضة السنة .

 مع العلم ان فى اغلب الاوقات الموضة دى مبتبقاش لايقة عليهم ولا ماشية معاهم اصلا .

نفس الفكرة بشوفها دلوقتى فى الشباب فى اغانى المهرجانات و الانضمام لروابط التشجيع (الاولتراس) كل الفكرة ان صحابه بيعملوا كدة او اصل ده المنتشر دلوقتى 


الموضوع مش لبس و اغانى و الكلام ده . الفكرة فى اسلوب حياة .. لما الناس او البيئة المحيطة تاثر عليك فى اختيار ادق تفاصيل الحياة فمن الطبيعى انها تاثر عليك فيما بعد فى كل حاجة الى ان يتم محو هويتك اللى بتميزك عن كل اللى موجودين على الارض 

مش حاجة حلوة على فكرة . ركزوا شوية و اسالوا نفسكم  السؤال اللى محيرنى جدا و هتجنن و الاقيله اجابة 

الشخصية  الى اين ؟

                                  

زمان و انا صغير

  كنت فى يوم قاعدة زهقانة قلت افتح الراديو اسمع عليه ايه  لقيت اغنية الفنان الجميل هشان عباس بيغنى
" زمااااااااااان و انا صغير كنت بحلم ابقى كبير ابقى كبير "

سرحت مع كلام الاغنية و قعدت افكر قولت اكيد كل واحد مننا كان ليه حلم ايام الطفولة و لما كبر اتصدم بالواقع المرير 
سواء بقى حقق الحلم بس مش مبسوط او الحلم راح مع اللى راحوا .. 

حاجة كمان 

انا اكتشفت ان احلام الاطفال دلوقتى مختلفة تماما عن احلام الاطفال زمان و طموحاتهم 

يعنى مثلا على سبيل المثال .. فى اى برنامج او حتى قرايبنا الكبار لما كانوا يسألو اطفال العيلة عايزين يطلعوا ايه ؟ الاولاد كانوا دايما مهندس او دكتور او طيار . و البنت دكتورة او مدرسة 

لكن دلوقتى و اللى استفزنى جدا انى لقيت ان الاهالى كلهم عايزين اولادهم يطلعو لاعيبة كورة لا و مش اى لاعيبة كورة عايزينهم ابو تريكة و شيكابلا الى بيجيبوا ملايين 

طيب لما يبقى شعب مصر كله لاعيبة كورة مين هيعالجنى و مين هيبنيلك بيتك و مين هيصلحلك عربيتك ؟؟ 

حاجة كمان زمان لما كنت اقول لماما دى فلانة باباها سواق تاكسى كانت بتتناقش معايا ان مهما كان الى قدامى ايه شغله طالما مش حرام يبقى ده احسن حد فى الدنيا و كفاية انه معيش اولاده حياة كويسة .. 

الكلام كان صعب بالنسبالى بس لما كبرت قدرت افهم الكلام ده اوى .. 

مش دى المشكلة المشكلة ان دلوقتى معظم الاهالى بيزرعوا فى اولادهم الطبقية بشكل غير مقصود اه مطلوب منك ان ابنك يبقى احسن شخص فى الدنيا بس كمان مطلوب منك تعلمه فن التعامل مع المستويات المختلفة 

الشائع دلوقتى ان الاهالى بيقولوا لولادهم  عايزك تبقى حاجة جامدة فى البلد عايزك تبقى كذا مش عايزك تبقى زى اونكل فلان او ابن اونكل علان و ده بيخلى الطفل يبنظر نظرة احتقار لاونكل فلان و ابن اونكل علان و بالتالى بتزيد عنده حتة الطبقية
لما قعدت مع قريبى الصغير و بقوله قولى بقى ايه الحاجة الى نفسك تعملها الولد عنده 4 سنين و قاللى نفسى احب
 !!!!
  رديت فى نفسى و قولت تحب ايه يا مفعوص ده و احنا قدك كان اخر طموحنا عروسة جديدة او اننا نقعد شوية زيادة فى النادى استغربت الولد جاب الكلام ده منين بس بعد كدة افتكرت انه البركة فى فيسبوك و الافلام اللى بيتفرجوا عليها من غير رقابة من الاهالى

عندى رسالتين لكل الاهالى يا رب بجد ننقذ اولادنا بيهم
الرسالة الاولى  بجد حاولوا تتعلموا فن التربية علشان منصحاش على جيل بشع و فى طبعه الجشاعة و عدم راعاة الاخرين و حب الذات و الانانية

  الرسالة التانية انتبهوا لولادكم شوية و بلاش الحرية الزيادة اللى الاطفال واخدينها ركزوا مع الاولاد و سيبوا الشغل شوية

 تحت شعار نسعى الى جيل يصنع المستقبل و يمجد التاريخ 

  .